確診COVID-19 日記：病徵、隔離、檢測、長新冠、康復

八月中確診Covid-19，雖然好多人仲未中招，但對比身邊人我算係好遲先確診。最近本港確診個案數量上升，所以同大家詳細分享康復過程。

簡單概括——接受居家隔離令，有被衛生署抽樣檢測，一星期內轉陰性，長新冠。病徵、感受、應對方法同後遺症如下。

察覺有病徵時，我請假去咗做自費核酸檢測，未收到報告喉嚨已經好痛——吞口水痛，開始失聲，但唔覺得「被刀割」，不過同平時嘅普通感冒嘅痛唔同，似係完全抽乾、有沙紙磨擦嘅感覺。一乾就會痛，一直好乾，所以痛到瞓唔著或扎醒，所以我含住紫色使立消喉糖瞓覺。本身食橙色檸蜜味，但食咗兩粒發現紫色Last 得耐啲。

由於飲水令喉嚨好痛，我含住一匙麥蘆卡蜂蜜，都係網上學返嚟，暫時舒緩到，但吞咗過一陣就痛返。無咩胃口，食得清淡。

夜晚收到檢測結果，陰性。但我由下晝開始自我居家隔離，因為病徵好明顯，如果聽朝快測都陰性先出嚟。獨自一個喺房、用獨立洗手間、獨立餐具等。開始每日食必理痛同消炎藥，用Betadine嘅漱口水同喉嚨噴霧，一開始「那」到標哂眼水。

翌日快速檢測，陽性。一開聲先知完全講唔到嘢，唔係普通沙聲，係把聲塞住喺喉嚨，用力出聲只得氣聲。喉嚨亦非常痛，喉糖好有用，Keep住唔乾就冇咁痛，亦可以含住喉糖飲水。含蜂蜜同食喉糖發現味覺異常，好似越嚟越淡味。

網上平台申報，填寫同住密切接觸者資料，取得隔離令，申報後翌日為隔離第一日，打兩針可以第六、七日快測陰性就提早結束隔離，得知將會上門派發物資同電子手帶。

隔離第一日，亦係我有病徵嘅第三日，用力出聲可以沙聲地簡單發音，開始不停流鼻水，透明嘅鼻水直流，直接用紙巾塞住鼻孔仲方便。喉嚨最痛係頭兩日，但都繼續含喉糖瞓覺，由痛到扎醒幾次變成扎醒一次。

政府人員上門派物資、安裝App同協助戴手帶，被告知唔可以熄電話，長開Location Service，第六、七日快測陰性可以自行剪手帶、刪App同申報取消隔離。過程係三分鐘內嘅事，手帶亦唔會戴得好緊。

為證實味覺異常，我食咗奶黃月餅。雖然唔應該食甜嘢，但嗰陣好Desparate（為食）就食咗舊月餅——聞到奶黃、蛋黃香但食落淡而無味，成粒啪入口，真係好似白麵包味道，但一咬就感覺到月餅嘅黏糯，嗰刻真係驚惶不安。好鍾意食嘢嘅人失去味覺原來好恐怖，食成個月餅都可以冇味嚇到差啲崩潰。

原來咩口味嘅喉糖都冇所謂，反正冇味覺（哭），即使鍾意檸蜜味都係食返紫色使立消。

隔離第二日，可能瞓得唔好，又可能係病，一直疲憊無力，基本上講唔到嘢，對住四面牆，睇劇睇戲打機都冇精神，同家人朋友溝通都係靠打字，完全失去味覺同聲線，成個體驗同普通感冒好唔同。

夜晚收到短訊話有人會嚟抽樣檢測，會喺門外放低檢測包裹，自行檢測後廿分鐘會拎走。當時網上有啲人話如果呢個時候轉陰就會被送去隔離營，政府亦寫明如果拒絕檢測可能會被罰款同監禁，所以我少少擔心，如果冇收到檢測包裹或突然轉陰咪出事。

隔離第三日，兩個衛生署人士致電通知上門檢測，結果係直接交低申報表同檢測物品，即時自己填寫同檢測，將棉花棒放入試管即可。

當喉嚨開始冇咁痛，鼻水都停咗，就變成乾咳。咳會令喉嚨少少痛，但主要係因為好乾、好痕先咳。咳係一直持續嘅病徵，所以開始飲咳水，反而其他確診人士講嘅頭痛發燒就一直都冇。

隔離第四日，收到琴日檢測化驗短訊係初陽。繼續咳，但已經講到嘢同正常飲食，喉嚨唔再痛，到夜晚做快測已經係陰性——距離最初有病徵係第六日，即係我喺一星期內已經康復。第五日都係陰性，繼續慢慢好緊。

隔離第六、七日，快速檢測陰性，上網申報快測陰性同結束隔離令。味覺逐漸恢復，咳逐漸減少，但係我發現自己有腦霧。成世人都冇試過——講講吓嘢唔記得自己講緊乜，被打斷就完全記唔起想講咩，講完一個話題即刻醒唔起上個話題。

過咗幾日去做運動，真係好易喘氣，五分鐘Work out變成半個鐘咁攰，體能差過一年唔做運動咁，上樓梯同上斜都會喘氣。行到一半氣喘都停低休息陣先，旁邊啲阿婆體力仲好過我。

以上兩樣嘢就係確診康復後最影響我嘅事，到今日都好困擾。腦霧係真，記憶力下降，體能下降，肺活量轉差。聽讀者朋友講會慢慢好返，但至少一兩個月先會轉好，睇中醫調理都可能有用，希望快啲好返啦。

我證實 It's not just a flu，如果你都確診，希望你早日康復，一日比一日更好。