《破·地獄》：超渡傳統家庭的進程，也是面對生死的省思

趁有時間寫全城熱話《破·地獄》，新鮮滾熱辣，我已經二刷咗。

上映前已預期呢套戲好收得，一黃子華，二許冠文，三華人社會談論死亡係禁忌，主演陣容加敏感話題，想像到劇本會透過生死帶出人生哲理，令觀眾深思存在同死亡嘅本質，電影的確符合預期，8.5/10分。

生離死別，本來就容易引人共鳴。就算未經歷過，多少都想像到。

電影成功帶動觀眾情緒，起初笑完「回禮禮物」就準備開始喊，喊到完場。我專登二刷，就係因為呢套戲好好喊。

故事細節頗多，對白都非常黃子華式嘅金句講經、計算。情節好簡單，簡單到你見到邊個疑似有病，邊個就將會死。但覆蓋內容廣泛，唔同鏡頭、情節、人物都代表唔同角度解讀宗教、殯儀業、葬禮意義，以及主軸嘅傳統家庭關係、生活同經濟壓力，面對自身同家人離世如何釋懷、寬恕等主題。男性主導嘅殯葬業，傳男不傳女，亦帶出老一輩重男輕女、守舊嘅偏見同觀念，人倫關係刻畫得細緻入微，同時劇本極其淺白易懂。

除咗主軸主題，都探討大量現實生活痛點——為生計被同輩嘲笑、喪妻喪母、照顧者壓力、家庭情緒勒索、養育子女壓力、順從與掙脫原生家庭枷鎖、彌補情感缺失、不道德關係意義。關於應否繼承衣缽、面對男尊女卑工作環境，我都有共鳴。

我鍾意幾個電影細節位——

電影出現蝴蝶特寫，蝴蝶意象係變幻無常。現實人事物無永恆不變，但人可通過自己嘅方式將人事物定格於永恆；

喪禮上，道生向女童解釋破地獄，手上拎住本民間傳說《目連救母》——目連羅漢見母親死後喺地獄受苦，向釋迦佛求助，最終得到佛嘅幫助，入地獄以禪杖打破地獄門，成功救出母親亡魂，呼應電影主題；

片頭介紹香港殯儀業主要由「行街」（經紀人）同喃嘸師傅配合「一文一武」組合，而大仔個名係「志斌」，即文、武；

最尾由女兒文玥破地獄，呢幕亦代表電影英文名《The Last Dance》。

好多朋友都認為男主角道生（黃子華飾）嘅角色成長同轉變突兀，但我覺得再細化更多具體個案推進劇情，反而會更冗長，但過渡嘅節奏的確可以改進。據導演透露，「女兒破地獄」其實係道生嘅主意，葬禮由佢負責，佢藉葬禮儀式為兩兄妹破生人地獄。另外，其實道生同各喃嘸師傅衝突牽強，大可直接講係文哥遺願，而且現實中師傅們未必咁大反應；最後有人覺得救護同性愛嘅轉折稍為生硬，但仔細觀察，上一幕心外壓同下一幕床戲節奏係一脈相承，情節邏輯、情感張力都貫通。

女主角衛詩雅演技出色，角色倔強固執冷漠，難以正確抒發情緒，只以行動表明心意，面對矛盾父女關係口硬心軟，我喺角色身上見到自己嘅影子。佢嗰種自我實現預言，由自幼嫌棄自己開始，失去母親、缺乏關愛、努力不被認可，就係佢嘅生人地獄。另外韋羅莎、梁雍婷演技都好精湛。

「我唔係一個會講『我愛你』嘅老竇，但我從來都冇覺得你丟我架。」呢句台詞，對好多華人子女嚟講都係一種釋懷。

按照傳統觀念，破地獄係為免亡者受地獄之苦，放下對塵世執著，淨化靈魂以便輪迴。而呢套戲打破常規，唔只超度亡者，亦超渡在世，「不必執著幾時落車，學會欣賞沿途風景」就係電影中心思想。如果能深入探討更多道教、殯葬等相關文化概念，應該更飽滿更有趣。

#破地獄 #破地獄影評