入邪教就似死心塌地愛人渣，點解受虐都不離不棄？

近日睇緊講#韓國邪教「#攝理教」嘅Netflix 紀錄片《#以神之名：#信仰的背叛》，其中受訪嘅香港受害者#葉萱 都被傳媒廣泛報導。

入邪教就似死心塌地愛人渣，只要不知不覺陷入其中，受虐都不離不棄。

大家唔明受害者點解加入邪教，覺得蠢人先會中招。好似一生冇遇過有毒關係嘅人，想像唔到家庭暴力受虐者嘅處境。

其實高學歷、高收入都可能受虐。迷茫不安想搵到意義同目的，缺乏支持陪伴想搵到歸宿——邪教同人渣就恰好提供所謂存在意義、虛假安全感同歸屬感。

對愛嘅迫切渴求，無意識地希望被照顧、引領、保護，有時勝過為自己著想嘅願望。內心自卑，隨時都可能被壓力同恐懼支配。

本來就感到受傷、孤獨、沮喪，心裡一直有不安全感、童年創傷、未被撫平嘅傷口、不被理解嘅傷痛，好易被精神控制同虐待。當覺得世界崩壞，對生命喪失控制感，能夠偶然抓住轉機或希望，就會好驚失去依靠。

邪教同人渣唔只虐待信徒或伴侶，都帶來前所未有嘅「溫暖」同「理解」，畢生未有過咁Intense 咁狂熱嘅「愛」，仲承諾一個歸宿。受虐者有時亦顯得脆弱，「失去你就會死」，令人有不尋常嘅聯繫感，受虐者都唔敢辜負、拒絕同離開。

聽話服從，被捧上天咁表揚認可；嘗試反抗，受到言語、身體、性嘅虐待。堅決離開，被糾纏騷擾，甚至被報復。無論出於忠誠定恐懼，都無法一走了之。

洗腦往往係溫水煮蛙，察覺自己受困已經太遲。

邪教同人渣都令你同自己疏遠、同親友分離，改變你嘅生活習慣、社交圈子、經濟狀況。越忠誠越依賴，越受威脅越覺渺小，越跟隨得耐越難捨棄。要離開邪教或人渣，等同向過去多年付出道別。

盲目付出，越難越愛，有時令人感到刺激同興奮，好似搵到生命意義同自我價值。一生人愛過人渣冇咩可怕，我都愛過人渣。其實關係好又邪教好，最重要係及時止蝕。

成功逃脫後，挺身而出指證施虐者，值得欣賞同敬佩。恭喜所有離開邪教同人渣嘅人，辛苦了，請好好休息。