婚前要求佢有學識有能力，婚後就要求佢做家庭主婦相夫教子

好多人婚前要求伴侶有一定學歷同工作能力，但婚後就要求伴侶做家庭主婦。

佢地追求男主外女主內嘅「傳統婚姻」——男方只負責提供經濟支持，屋企大小事務（如家務、處理雜費、養育兒女）都交低俾女方。

有學識有能力，當然更能勝任職場或家庭中嘅角色。擇偶條件冇標準，但婚前想女方對職業有抱負，最好有野心又有地位，婚後就要求女方為婚姻放低對職業嘅追求，就有啲矛盾。

唔係「唔好返工咁辛苦啦，我養你」，而係直接要求對方擔當家庭主婦嘅角色，即使冇講明「你要做家庭主婦」，實際上早就將所有相關責任交俾對方，自己打「我返工已經好辛苦」嘅旗號推卸家庭責任。

「我全日都返工」，所以返到屋企咩都唔洗做，甚至堅持自己必須係Provider，要求老婆順從呢一點——老婆有冇返工都好，必須負責屋企所有事務。

而佢地婚後將返工賺錢視為一種「犧牲」，即使佢地婚前已需要工作。

就算老婆選擇返工賺錢，佢地都認為係「不必要」，即使家庭有兩份穩定收入，有能力僱用姐姐或保姆照顧小朋友，都寧願老婆放棄工作、放棄經濟權力、放棄財務自由，好聽就係留喺屋企相夫教子，實際上係說服老婆學做保姆、女傭、廚師。

當婚姻出現任何問題，其中一方陷入經濟困境就自動失去選擇去留嘅權利，都係極常見嘅個案。

雙方配合並自願成為Stay at home wife/husband，我覺得完全冇問題；但堅持要求對方留喺屋企，希望有人承擔自己作為成年人及家長嘅責任，唔願意精神上承擔一個家，而自己只需每週工作40小時，我覺得有問題，不過我冇權亦唔會阻止任何人嘅抉擇。

如果有日我成為全職大太，一定會係我自願、Comfortable嘅時候，並預先一齊探討點避免過份依賴或控制對方，保持一定程度嘅獨立，而唔係純粹為咗配合伴侶對所謂傳統婚姻嘅追求，或天真地相信有情飲水飽就放棄事業同理想。