#大埔龍尾村碎屍案：睇新聞睇到寢食難安，點算好？

各位讀者朋友都話睇完大埔龍尾村碎屍案後有強烈不安感。

睇新聞睇到Traumatized，一啲都唔出奇。

Vicarious traumatization （替代性創傷）就係指人目睹悲慘、災難場景或接觸到災民遭遇後情緒異常，包括普通民眾上網或睇電視後接觸大量訊息後情緒異常。

呢幾日大家都被暴力、仇恨同駭人嘅細節淹沒——有啲人可能本身認識本案任何人及其家屬，有啲人住喺附近，有啲人純粹幻想到已經好難受。我自己都一直留意，唔覺意就接收好多好詳細嘅資訊。

有網絡就接收資訊嘅年代裡太易搵文字資料，加上周圍都係疑似或相近圖像，仲隨時收到新聞通知關注最新案情，即使無身歷其境，了解件事已經對心理健康產生負面影響。

如果你同案中人物或地點有任何關係，你可能更焦慮、恐懼同無助。

當你注意到自己開始特別易緊張、精神上好疲憊、失眠、發惡夢、情緒低落、食慾受影響，是但一樣都好，係時候減少睇新聞、暫停留意案件嘅發展。抽啲時間俾自己休息，你需要增加瞓覺、運動、冥想同娛樂嘅時間。

暫時放低件事，唔代表唔關心件事。

放低一陣，照顧好自己先。限制自己用電話、電腦嘅時間，Pause咗Apps啲通知先。可能一開始諗住睇兩篇，但唔覺意就花咗成個鐘睇得好深入。

社交媒體比傳統報紙雜誌提供更多、更詳細又未必真實嘅資訊，網上嘅人唔會理你有幾敏感，你需要主動照顧自己。

如果有需要，你可以搵任何專業人士尋求意見，亦歡迎DM同我傾吓。