#在囚人士 的精神健康（2）：簡單又日常可用嘅小技巧

上一篇講到點解需要關注同正視在囚人士嘅精神健康，今次就重點分享照顧精神健康嘅小技巧。

希望你明白，每個人嘅精神健康都會波動，有情緒低落同壓力大嘅時候，呢啲感覺會隨時間減輕，但有時佢地會發展成更嚴重嘅問題。

我地嘅精神健康同我地嘅思維、感受、應對方式、復原力都好有關。如果你認為監禁後有情緒問題係「正常」，咁在囚期間照顧自己嘅精神健康都好正常。

喺一個陌生、嘈雜、每日做例行公事嘅環境中生活，只要願意照顧精神健康，就更容易應對監禁環境中嘅生活，亦可以改變自己嘅感受，覺察自我意識，同自己、外界建立更牢固嘅關係。

照顧自己嘅第一步，就係同自己保持聯繫，其實比想像中簡單——保持定期衛生習慣，例如洗臉、刷牙、認真沖涼、著好件衫。當你情緒低落時，你可能連自己嘅儀表都唔想理，但蓬頭垢面、唔注意衛生會影響自尊，導致更強烈嘅孤立感。

飲食盡量均衡，充分利用三餐時間，即使好唔想食嘢，都盡量為身體進食，多飲水，因為身體健康都會令精神健康進步。既然每日都要做，咁不如把握自我照顧嘅機會。

然後令自己忙碌，有機會就鍛鍊身心，都可以降低抑鬱嘅風險，令自己健康都可以幫助集中注意力，有時間就閱讀同寫作，或者學新技能、新興趣，越忙就越少時間被負面情緒佔據。

令自己忙碌，最好嘅方法就係專注、集中，加上自我覺察。做嘅時候多啲留意自己嘅感受、感覺、想法、身體變化，但只係留意，唔洗刻意改變。

啱啱入去可能好驚，唔知可以去邊，可以信邊個，可以做咩，覺得冇人幫到你、陪到你，好迷失。記住任何人喺陌生環境都需要支持同幫助，需要支持亦唔係軟弱嘅表現。當你逐漸了解規則，你會慢慢感到輕鬆。

講出自己感受唔容易，唔只在囚人士，大把人都唔習慣分享心事，亦未必搵到絕對信任嘅人傾訴。提前計劃好自己想講嘅嘢會有幫助，被聆聽都會令你感到更踏實、更被支持。而呢一切唔代表「痊癒」、「生活變得美好」，而係知道自己被支持，知道自己唔係孤單。

嘗試識別同理解自己嘅消極情緒，想法嘅來源，然後用唔同方式去重新理解呢件事，用更積極嘅短語去提醒自己。

比如係——

「我值得快樂。」

「我比自己想像中有價值。」

「我可以從中學習。」

「我可以慢慢嚟。唔需要急。」

「我以前都捱過，依家都可以捱得過。」

「我需要理解同接受自己在囚嘅事實，而我仍然可以選擇成就我嘅人生。」

每日都同自己講一啲自我肯定語，可以幫助你挑戰同克服自我摧毀、消極想法，當你經常重複呢啲語句並相信佢，你就可以做出積極改變，從消極、恐懼、擔憂同焦慮中解脫。當我地利用呢啲語句去反思價值觀，面對自我意識相矛盾同威脅嘅訊息時，就會減輕經歷痛苦同做出防禦性反應。

世上有好多嘢都可以控制，但有啲事情始終無法控制，嘗試專注喺可控制嘅地方。

我知好難，但凡事都要先嘗試先有改變。好多人以為要「有動力就開始行動」，其實動力只會喺開始行動後慢慢追上步伐。