#在囚人士 的精神健康（1）：點解值得關注同正視？

監禁影響精神健康，由冇變有情緒病，或者由有情緒病再惡化，可惜大部分人都冇機會接受任何治療。

雖然監禁後患上抑鬱症、焦慮症、創傷後壓力症候群好常見，但未必有人識別到症狀。就算識別到都認為係「正常反應」。呢種假設其實否認咗所有情緒問題，亦令好多患者喺沉默中受苦。

失去目標、失去自由，冇辦法為深愛嘅人同家庭作出貢獻，同外面嘅世界脫節，都會對精神健康造成嚴重嘅影響。加上身份同角色被剝奪——身為父母仔女、兄弟姐妹、咩學歷咩職業、咩成就咩技能，都似乎唔再重要，所以好容易喪失自我意識同迷失方向。

當在囚人士無法同家人朋友相處，佢地唔只掛住相處嘅時間，仲會掛住日常生活嘅細節，越掛念就越增加孤獨感。無法陪伴外面嘅親友亦令佢地好無力，擔心年幼同年邁嘅家庭成員，無法陪伴同錯過重要日子亦令佢地悲傷。

如果目睹或親身經歷暴力行為、因紀律或安全問題而被隔離、單獨監禁，更造成嚴重情緒困擾，直接影響佢地將來重新融入社區嘅適應度。

雖然懲教署提供心理輔導服務，為在囚人士提供心理評估服務報告，以供法庭、有關覆檢委員會及管理當局參考，亦因應再犯風險同更生需要原則，為有情緒及行為問題嘅在囚人士提供輔導服務，比如針對性罪犯、成癮者、暴力心理治療等。

但監禁期間仍然有好多人受情緒病困擾，當缺乏身體同心理上嘅安全感，又處於限制性環境中，自然難以敞開心扉，所以希望大家關注同正視在囚人士嘅精神健康問題。

無論還押或定罪嘅在囚人士，都需要照顧自己嘅精神健康。下一篇，我將會重點分享在囚人士照顧精神健康嘅小技巧。