《命案》影評：精神病人與心理變態的自救

▫️電影透過玄學探討命運，懸疑兇案帶出人性，我覺得係香港電影嘅新角度——玄學唔配喜劇，兇案唔靠嚇。氣氛唔係好Dark 好沉重，但內容瘋狂、血腥特寫，配樂卻輕鬆得詭譎，全故事不斷喺差少少就屈服嘅Edge徘徊，越睇越緊張，接近兩個鐘反復呈現「一切皆是命」VS「可改寫命運」。

▫️網民批評殺人犯背景同動機唔夠詳細，其實Psychopath、無差別殺人喺世界各地好常見，好多罪犯天生就係咁，同家庭社會背景未必有關，所以我覺得無違和。

▫️林家棟演活精神病人，眼神同表情轉變明顯而順暢，角色有血有肉地懦弱、勇敢、善良、兇殘、瘋癲，用盡全力放生積德，用盡全力禁錮同傷害他人，而佢嘅演技令成件事極自然。

▫️Lokman同陳湛文演出有驚喜，睇過IT狗更覺得佢地係好演員。Lokman嘅憤怒同衝動帶半點善良，表現出缺乏同理心卻多次臨崖勒馬嘅掙扎；陳湛文雖然對白較少，但靠眼神、肢體動作、簡單對話都營造到被Triggered 就想捕獵嘅連環殺人犯氣息。

▫️我會形容呢套戲為「精神病人與心理變態的自救」，相信有啲人就係Born evil，不過人生係自己選擇——順應天命定抗衡到底？大家都係一隻蟻，渺小、命定、力爭上游；大家同時都係一朵花，燦爛後終會枯萎，如何接受天命燃燒殆盡，坦然接受去種果？我覺得「選擇」就係呢套戲嘅宗旨。 p.s. Mad Fate，英文改得幾好。

⭐️：8/10