「我隻貓今朝叫我唔好返工。」

今朝睇到一個連登Post——十六腦貓貓腎衰竭，由「由好生猛喺屋跑黎跑去，到今朝行路拐下拐下又無胃口」，樓主中午專登買佢鍾意嘅零食俾佢，但到家後貓貓已經離開。

「今朝返工前來回摸咗佢幾次頭，

叫佢加油等我返黎有正野食。

佢已經唔識貓貓叫，望住我嗚住幾聲。

我就出咗門口……」

失去寵物嘅悲痛，係同失去人類親友一樣。旁人可能無法理解，唔知點安慰、支持喪親者。我希望同樓主，以及所有珍惜寵物嘅人分享——

人同寵物嘅關係好特殊，明明無法以言語溝通，但係彼此最好嘅朋友。同一屋簷下，起居飲食生活習慣不一，但成為最親密嘅家庭成員。

寵物無條件愛護你，喺佢眼中，無論你咩狀態都係最完美。就算係你櫃桶底最舊嘅爛衫都係最柔軟、最安全嘅避風港。佢見過你嘅脆弱同堅強，佢比任何人都更留意你嘅眼淚，可能係佢更敏銳，亦可能係你從來冇喺佢面前掩飾。無論佢幾多歲，佢一直都係小朋友，依賴你、注視你，深愛你、接納你。

你嘅世界好大，但佢嘅世界一直係你，而你明白佢就算再長壽都永遠唔夠長。

失去佢可能令你好後悔、好嬲、好痛，就算其他人唔明，唔緊要，呢啲情緒完全正常，你值得被理解，你嘅內疚、憤怒、崩潰都係喪親嘅一部分。你已經失去家庭成員，唔需要同任何人比較。冇人嘅痛苦係更重要、更痛苦，你可以尊重自己嘅痛苦。

你可能自責冇陪佢到最後一刻，但你已經陪咗佢一生。你地一齊共渡最快樂、最幸福嘅時光，呢段日子唔只你享受，佢都好滿足。

你可能自責冇察覺最後嘅訊號，但其實佢好可能早就知道。小動物同人類唔同，佢離開前已經同你道別——最後一次，就係同你講「再見啦，多謝你，我愛你。」喺你嘅愛包圍下，佢堅強、勇敢、有安全感咁先走一步。

相信所有小動物最後都去彩虹橋，佢都一樣。佢去到彩虹橋會同其他小動物一齊生活，佢會再次精神、健康、強壯。嗰度有充足嘅食物、水同陽光，喺最舒適溫暖嘅地方休息。佢喺嗰度等你，總有一日你地會再次相聚，佢唔只記得你，心裡一直有你，佢依然期待依賴你、注視你、深愛你、接納你。

現今嘅你有好多愛，唔只你留俾佢，亦係佢留俾你繼續生活、繼續去探索呢個世界。你可以用任何方式去紀念佢、掛住佢。佢只能走到呢度，接下來靠你帶住呢份愛繼續前行。再次相聚之前多珍重，佢都希望如此。

p.s. 祝福樓主，我喺高登見過你隻貓貓，佢好靚好可愛🥰