「已婚母親最好的朋友不應是男人」？

今日睇咗一篇心理學家Dr. Meg Meeker 寫嘅文，佢話「已婚母親不應該把男人作為她們最好的朋友，反之亦然。」。

佢話「給情感上親密的異性戀伴侶足夠的時間，身體上的親密關係隨之而來。或者，至少身體的誘惑出現了。在異性戀者之間的同性友誼，自然界限的存在阻止了性親密的發生。」

「如果你 15 歲的孩子走進一家餐館，看到你，他的母親，在爸爸在家的時候和你最好的朋友山姆共進晚餐，他會怎麼想？很奇怪。孩子們的感受很重要。」

「如果不是為了孩子，那就為了婚姻健康。」

「媽媽們，你最好的朋友應該是女性。」

睇完之後真係呆咗。

作者認為只要同一個人相處夠耐，自然就會有身體上嘅親密關係、誘惑彼此。佢可能從來都冇「純友誼」，幻想唔到男女之間可以完全冇性吸引力。朋友唔一定要戀人未滿，朋友可以真係朋友。

唔係因為其中一方太樣衰、太廢、太冇魅力；只要冇Feel、太熟悉、冇興趣拍拖、深愛著其他人已經令佢地係純友誼。唔通一有新朋友就自然墮入愛河？咁大家都好唔得閒，唔怪得咁多人阻止伴侶出街－－行出去就會鍾意人，關係真係好脆弱。

平日大家講Feel又重視Timing，一到限制友誼圈就搬龍門，彷彿只要兩個人傾到計就會建立友誼以上嘅關係，忽略好多人真係做朋友就夠，「發展唔到」係好自然好平常嘅事。

作者亦話同性友誼先夠安全，因為自然界限阻止性親密。太滑稽都唔洗多講，唔知放喺集中討論LGBTQ嘅地方會點？

如果我有個十五歲嘅仔，見到我同異性朋友食飯，佢會點諗？我唔知佢點諗，一嚟佢未出世，二嚟我唔會教我個仔「拖手就會結婚、錫錫就會有BB」，所以佢應該唔會認為「食飯就等如拍拖」。

拍拖後、結婚後、生育後要有所避諱，重視家人感受，有堅定嘅界線、有分寸，但係咪即刻同朋友絕交？為咗關係健康、做孩子好榜樣，更唔應該輕易放棄自己嘅Support system。

媽媽們，如果你本身就好多朋友，男女都好，你地識咗好耐，共患難又一齊成長，只要友誼唔會令你犧牲家庭，你都唔應該為家庭犧牲佢地。

原文：https://www.meekerparenting.com/blog/should-married-women-have-men-as-their-best-friends