《#Barbie》：女權主義者有共鳴？抑或嫌唔夠有深度？

入場前喺戲院睇過Trailer，當時都冇咩興趣，但朋友話好適合我睇，話我會有共鳴，所以我先入場睇。預計自己一係好鍾意，一係非常失望。以下劇透。

《Barbie》係美式Fantasy comedy，笑位極多，冇咩悶場，呢一點要讚。相信受眾係年輕人，特別係玩過Barbie 嘅人，但我懷疑現今年輕一代有冇親身玩過Barbie？我細個收過十個Barbie 左右，發現套戲細節位跟得好足（如踮腳尖、玩具盒、夢幻大屋、飲料道具等），我亦唔小心整過Weird Barbie出嚟。

利用玩具本身嘅魅力，做到佈景道具都唔塑膠唔Cheap，Nostalgia 位令人回味，為沉重話題增添輕鬆色彩。

我本身有啲抗拒睇「絕對抵制父權嘅強烈女權電影」，因為太易令人覺得係皈依者狂熱（即對新信仰強烈推崇，同舊信仰堅決劃清界限），但我覺得《Barbie》恰到好處，對比近年嘅《Captain Marvel》 流暢好多。而呢套年輕化喜劇利用成熟嘅企業知識產權去清晰傳遞訊息，算好成功，例如各種階層同職業嘅Barbie 簡單直接表達平權意識，相信小朋友都好易明。

呢種定位根本唔預佢「有深度、狂扭橋」，佢唔係賣呢啲嘢。我都覺得每隔十分鐘傳遞訊息有啲似聽講座，媽媽最長嗰段對白直頭有啲似中年婦人發洩，有啲好易明嘅嘢反而呈現得唔夠聰明。

不過對一部關於玩具嘅電影深度應有何期待？

有限嘅故事情節呈現各種社會問題，本身就難以深入情境化，精心設計到故事圓滿又帶教育意義已經唔容易，冇過份執著政治正確都抵讚啦。為免太深奧冇咁多 Noise又難以解讀，套戲以非黑即白、簡單化嘅方式去講女權，係以好入門、好直白嘅方式帶出意義。

故事整體比Trailer 豐富，雖然情節較簡單，但除咗性別平權，都有探討情緒——如樂觀前先理解情緒；仲有輕輕提及Aging、青少年嘅Identity、既定身體形象、完美主義、父母子女相處變化、死亡等。

眼花繚亂嘅場境、愚蠢搞笑嘅氣氛之間，完整講故事而唔令人窒息，娛樂中蘊藏心思，再配合無限個Stereotypes，Greta Gerwig 巧妙抬高Barbie 嘅媚俗同花哨，同時貶低大眾對完美身體刻板形象嘅追求，令本身只想睇爆谷片嘅觀眾得到唔同程度嘅啟發。

至於Ken 呢個角色全戲最愚蠢膚淺、戀愛大過天，可能令男性觀眾感到被冒犯，而同時我認為導演有故意Provoke 呢種情緒去展示現今社會對女性嘅態度，亦有女權分子認為「男性越被冒犯越好」。呢方面我係唔太受嘅，呢種自鳴得意、高高在上嘅想法多咗，呢種刻意有啲突兀，所以扣分。

選角好好，Margot Robbie 可能係現今荷里活最適合做Stereotypical Barbie 嘅演員，樣靚身材正有女人味、有喜感、放得嚟唔太誇張；Ryan Gosling 一向靚仔，魁梧但唔大陣佬味，跳舞好睇，做Romance 男主角好拿手。

講玩具嘅溫馨喜劇，帶啲教育意義，靚人靚景，有對Mattel 同玩具本身致敬，宣傳成功到咁多人著哂粉紅、桃紅衫去睇，8分啦。

8/10