立即同情緒病伴侶分手？抑或死守關係到底？

讀者sent咗「請立即同你有情緒病嘅另一半分手」呢個Post俾我，問我意見。

樓主話：「有情緒病精神病嘅絕對唔係一個正常人，佢會成為你一生嘅負累，甚至難保日後自己有咩生命危險，唔洗多講，搵個好藉口同佢分手。」

又講Unpopular opinion，我諗唔多治療師會公開講以下嘅嘢。

分手本身就艱難，如果任何一方患病就更艱難。然而當伴侶患有嚴重情緒或精神疾病，分手的確係其中一個選擇。

分手本身冇話啱定錯。

有情緒病或精神病係咪唔值得被愛？你都知答案。佢地需要更多關愛、包容，但佢地都係獨立個體，有自我價值同尊嚴。同時我唔會叫任何人大愛包容情緒病或精神病人，死守關係、分手都唔係唯一解決方法。

我覺得如果接受唔到，無謂勉強，長痛不如短痛。有病，自然需要人照顧。感冒發燒都要睇醫生食藥，想被安慰、陪伴、支持，更何況長期病患者。

每對情侶都會渡過困難時期，「感建分」唔係一個Legit嘅處理方法。考慮分手前，佢有冇尋求專業幫助？如果佢冇，你有冇鼓勵佢獲得適當治療？當然鼓勵唔係指威脅、強迫，我地都需要學習點樣照顧同支持一個人。

當病患經常有極端情緒反應，行為亦對伴侶產生負面影響，長遠嚟講真係會成為負擔，仲可能導致自殺或其他嚴重健康問題。如果佢需要治療或藥物控制病情，而唔願意接受治療，盡咗力都幫唔到，咁就要面對現實。

然而我見過好多人，習慣打情緒或精神病旗號去自私自利、情緒勒索同傷害伴侶。

有病唔緊要，人人都有機會病，但明知自己有病都唔積極面對，放棄健康仲推卸責任俾伴侶，用個病威脅同guilt-trip對方，要求佢絕對服從，仲當佢係情緒垃圾桶而毫無悔意，咁就同個病無關，呢種人早分早享受。