入邪教如同愛人渣：親友如何幫助同說服佢地抽身？

前幾日講點解有人會入邪教同愛人渣，咁如果身邊人真係陷入去，親友可以點幫佢地？

作為旁觀者可能一眼就睇穿件事，但當事人未必發現自己身陷險境。幫助佢之前，你需要同建立互相信任嘅關係，程度係至少佢肯同你講真話。然後你自己了解咗精神控制同虐待先，再慢慢同佢有耐性、帶有尊重地討論。

表面上理智嘅人，都有可能被欺騙同說服去相信最離譜嘅事，只要佢心中有渴望、佢Desprate 就有可能中招。而邪教或人渣好清楚呢一點，尤其向忠誠嘅人落手——因為忠誠到願意切斷同所有人聯繫，只為依賴、保護同服從對方。

你定期同當事人傾計，尊重佢嘅想法，其實會令佢同「外界」多咗接觸，然後先慢慢引導佢開始重新理性思考。

輔導朋友幫助邪教人士復康超過十年，佢話思想改造、洗腦、精神控制，全部難以透過理性爭論而有好結果，所以有耐性好重要。

想拉一個人出嚟，唔一定要同佢爭執、講道理，反而一齊做啲有趣活動，積極建立良好關係，帶佢出去見吓其他「正常人」，令佢生活重返正軌。多啲休息，多啲健康活動，少啲提起邪教同人渣。

如果佢主動提起，你就以開放嘅心去聆聽，當聽故仔咁等佢分享。聽落幾滑稽幾離奇、幾唔同意佢嘅行為同論點都好，唔緊要，講「我覺得XXX」，而唔係直接分對錯。

當佢唔再恐懼去講真話，唔需要「教」佢點做，只需要引導佢以多角度睇清現實，佢自己會發現有問題。

承認自己錯都需要勇氣，俾啲時間佢，佢唔係一日之內陷入去，都唔會一日之內抽返隻腳出嚟。