#鑽石山荷里活斬人案：精神病患者有冇暴力傾向？

#精神病患者 唔一定都有#暴力傾向。

早前香港鑽石山荷里活廣場發生斬人案，唔代表所有精神病患者嘅行為。事實上，大部分精神病患者都對自己同埋其他人嘅安全都有一定關注同尊重。

部分精神病，例如精神分裂症或者躁鬱症，可能會增加患者嘅暴力傾向，但係隨機殺人事件係好罕見。

我自己睇完咁詳細嘅影片同報道都覺得唔舒服，希望大家明白呢啲情緒係正常反應。如果真係無法自控，請暫停接收相關資訊。震驚同不安之後，我哋需要保持理性同獨立思考能力。即使無法幫到患者尋求適合嘅醫療協助，都應該避免歧視或污名化精神病患者。

要分辨精神病患者有冇暴力傾向係一個複雜嘅問題，當中取決好多因素。治療師評估一個精神病患者有冇暴力傾向時，都需要了解患者嘅病史同病情，個人背景同經歷，包括佢哋嘅診斷、症狀、治療歷程，留意早期警告信號，例如情緒波動、緊張不安、恐懼、易怒同埋疑心等等，同埋觀察佢嘅外在表現同環境因素，例如佢嘅肢體語言、有冇獲得社會支持、醫療照顧同社交互動能力等等。

對外人而言，去判斷一個人有冇暴力傾向係非常困難，尤其係缺乏關於精神病嘅專業知識同對患者嘅了解，例如我哋冇辦法知道佢係咪被孤立或者排斥，亦都唔知佢哋嘅犯罪紀錄或者病歷，無法深入評估同觀察。

大家可以做嘅係多啲關注精神健康問題，同時鼓勵患者尋求適當協助，盡快獲得適當治療。而我哋要明白嘅係，精神病患者唔一定都有暴力傾向。

在此祝願被害者安息同祝福其家屬。