控制#男性凝視？著低胸短裙黑絲化濃妝，Post 性感相呃Like有問題？

琴晚讀者朋友分享一篇關於Male gaze（男性凝視）嘅文章俾我，佢話我應該會感興趣——文章提及從事保險業嘅女性喺自己IG 上張貼性感照，被侮辱為「保險雞」、「開床單」。

本身大眾對保險業嘅偏頗印象，加上張貼性感照就Slut-shame，都唔係新鮮事。

By the way 我好鍾意同讀者交流，持續分享係我寫作嘅其中一個原因，而你地向我分享就好似拋波出去有人接仲有人扔返嚟咁，同埋你地Get 到我嘅Taste，有知音係好爽嘅事。

講返Male gaze，廣泛意指男性看待女性嘅方式賦予男性權力，同時令男、女性都Sexualize 女性、限制、貶低女性。

男性本身會否扭曲女性價值、將女性及其身體視為可佔有、使用嘅物品或道具（物化女性），唔係我可以控制嘅事，一嚟我唔係男性，二嚟我唔可以控制他人思想。

雖然男性凝視可能鼓勵女性自我物化同尊重父權，但我唔同意咁就一定阻礙女性賦權同自我倡導。

身為女性，我可以決定應否因「被凝視」延伸去影響自我認知，包括形象、自尊同自我價值；我需唔需要遵從父權嘅觀點去改變自己對身體、能力同地位嘅態度；應否屈服於異性目光，集中取悅異性並為之競爭；如何監控同關注自己的身體等，都係個人選擇。

近年男女明星KOL都裸露、擺挑逗姿勢，社會唔再只係性感化女性，除剩內褲呃Like 又豈止女性？

大眾表示「默許Male gaze 會令女性著低胸短裙黑絲化濃妝呃Like」，但我唔排除佢係真心鍾意咁打扮，拍攝同發放性感相都係令自己開心。

再者控制任何人凝視好難，控制他人本身就好難。自己主動擺脫標籤，了解自己為邊個扮靚，同教育下一代自主選擇仲有助個人發展。

如果被他人凝視會增加身體羞恥感，咁溫柔以同情心注視同欣賞自己，為自己重拾身體自主權，比起阻止凝視更重要。