The only thing that doesn't change is that everything changes.

The only thing that doesn't change is that everything changes. （變是唯一不變）可以話係我近年面對人生百態嘅態度，不過我都花咗好多時間接受呢個事實。

無論去留，無論關係狀況，只要活著就有變化，人生不停挑戰我地點適應所有變化，改變越突發就越不知所措。

以前面對不確定性同變化會好緊張不安，即使口裡說不，身體都想盡力「控制」狀況。有時擔憂到覺得擔憂根本係件羞恥事，盡哂力都挽救唔到就更加自責、內疚。

今日嘅我會索性承認自己嘅情緒——係，我係擔心；係，我係改變唔到。

對以前嘅我嚟講，呢啲說話真係好難講出口，我好執著、好倔強，唔想承認無能為力。不過我發現呢種心態唔只無法安撫或幫助我，仲拖我後腿，所以我開始努力學習放低執著。

同情緒對抗，好難理解情緒想表達嘅訊息。唔肯關注自己嘅情緒，佢都會搵辦法跑出嚟，所以我覺得最好都係及早照顧自己情緒，喺佢出現時俾時間同耐性佢。

盡力都改變唔到，可以點？盡咗力喎，即係已經試過所有你識嘅方法——唔識、未諗過、唔知點做、做錯、未夠好嘅，都只可以逐步學會。學習過程有人支持，有親友、治療師、Consultants、Mentors就當然更順暢。

情況點改變都好，搵時間同空間俾自己處理情緒，適當地尋求協助，其他嘅嘢，let it be。