父親患癌，移民兒子應否返港陪父？

連登Post 樓主已移民，問應否返港陪伴末期癌症父親？佢強調成長過程困難，「讀書結婚買樓都靠自己」，同老豆政見唔同，當初為更好生活移民。最近老豆健康狀況日益惡化，應否「拋低另一半同份工」返港？左右為難。

返香港的確擾亂目前生活，亦係履行道德責任同表達感激之情嘅方式，邊樣重要？家庭責任同個人發展嘅平衡，冇標準答案，每個人嘅情況同Priority 都唔同。

樓主直認非醫護，起居飲食都幫唔到手，只係識企喺度。好多人以為「只係識企喺度」冇咩用，其實屋企人嘅Presence 能夠為癌症患者提供情感支持同減輕部分負擔同壓力。存在本身就係一種支持，困難時期「肯企喺度」，已經為對方帶來慰藉。

樓主怕一去不返，「等到佢壽終唔知等幾耐」，呢種Dichotomous thinking 令佢好Struggled 。咁不如考慮替代方案，​唔需要移民返港二揀一。考慮偶爾探訪、保持定期Video Call，最重要係保持定期聯繫。

如果問我，我覺得面對至親離世嘅痛苦已經艱難，花啲時間了解父親嘅觀點，唔只父親嘅角度，亦係末期癌病患者嘅角度，用同理心同耐心去理解佢，誠實對話會更容易搵到答案。

試吓減少專注喺最壞嘅情況上，試吓假設自己嘅存在為父母產生正面影響，亦試吓考慮潛在嘅妥協或解決方案，總有方法同時維繫人際關係同工作。既然情況複雜，接受未必搵到十全十美方案，但唔一定非黑即白。

除咗尊重老人家意願，都尊重自己嘅需求，考慮自己嘅生活同承諾，用一種自己負擔到嘅方式支持同表達對家庭成員嘅愛。記得同伴侶溝通，有需要可以搵專業人士協助，亦歡迎同我討論。祝樓主同家人平安。