人生洗腦課程：突然撞邪咁有正能量，點解容易被洗腦？

你有冇朋友上完一個課程、接觸一種興趣、轉咗一份工後，成個人就撞邪咁特別樂觀、特別正能量？

今朝睇咗個關於人生洗腦課程嘅連登Post，樓主上咗一個「人生課程」，分享連續軍訓式上堂嘅細節，包括課程內容、洗腦手段、學員之間互動、課後功課同導師跟進等。其中手段包括每次上課前播放緊張音樂、課室拉簾再調至低溫、活動時間過長、強調必須服從課堂守則、活動期間禁止同外界接觸、遲到兩秒即重罰、舊生接新生放學、組長配合課堂內外疲勞轟炸、禁止對外透露課程內容等。

凝聚一班人生無方向又迷茫嘅學員，利用負面情緒同童年陰影達至共鳴，分組玩令人情緒大起大落嘅遊戲，再教導學員合理化受害經驗，再灌輸不擇手段理念去實現目標，將其稱作遵守承諾。

你可以話中小學夏令營、大學Ocamp 都係玩遊戲，團結消耗體力做Tasks，腎上腺素急升，再圍埋講義氣傾願景，短時間內牽動情緒。咁人生洗腦課程同去Camp 有咩分別？洗腦課程係隱蔽式進行，利用強制隔離、疲勞轟炸、恐嚇威脅、心理虐待去削弱學員自主性同思考能力，極端操縱學員思想同情緒，令佢地成為盲目追隨者；普通Camp 係完全公開，鼓勵學員發揮創造力和思維能力，通過合作、競爭同挑戰去培養領導才能同團隊合作精神。

洗腦，即係思想改造，令人服從同違背意願下作出改變。洗腦係侵入性嘅影響方式，令一個人崩潰、完全孤立同依賴，一邊疏導罪惡感一邊增強罪惡感，又強調突破同重生，所以多數喺戰俘營、極權主義邪教中發生。

香港今日，周圍都有各種思想改造課程。

如果你懷疑自己或朋友被洗腦，可以留意有冇接觸過「打破自我、引入救贖可能性、重建自我」嘅內容，呢三個階段就係最常見嘅思想改造步驟。

1. 先攻擊你嘅身份同自我意識，令你迷失、內疚、有羞恥感；

2. 俾機會你自白、被拯救但同時自我排斥；

3. 引導你自己「選擇」棄舊迎新，從今拒絕舊嘅信仰體系，效忠新嘅思想

洗腦完畢。

至於點解有啲人會被洗腦？容易自我懷疑、負罪感、非黑即白思維、童年受虐、有複雜家庭問題嘅人都較易被洗腦。佢地多數被志同道合嘅人推薦而自願參與活動，或者為維繫關係先參與。經歷重大挫折、失去親友，唔知同邊個傾訴，無從依靠，更可能接觸呢種隱蔽式思想改造活動。

能夠抵抗洗腦嘅人，本身就高自信高自尊、強烈自我認同感、有獨立思考能力、情緒穩定，而呢種人多唔多？坦白講，我覺得唔多，所以保持精神健康先咁重要。

LIHKG原Post《去左人生洗腦課程，記錄晒入面所有內容細節》：https://lihkg.com/thread/3432697/page/1