《Rick and Morty》：科幻冒險下探討精神問題與人格障礙
- 彌詩
- 2024年11月29日
- 讀畢需時 3 分鐘
充滿奇幻、科幻元素，穿梭不同宇宙嘅冒險故事為主軸，黑色幽默同反諷為主要風格嘅動畫。除咗人物角色形象鮮明，每個角色都有獨特性格，關係複雜，仲探討一啲深刻主題，如人格障礙、家庭關係、人生意義等，就係《Rick and Morty》。
最近重睇《Rick and Morty（瑞克和莫蒂）》，我幾鍾意呢套美國電視科幻情景喜劇動畫，10分我會俾8.5分。每個角色都有唔同程度嘅精神問題同人格障礙，每個角色都好Complex，互動有趣。
主角Rick Sanchez 係全宇宙最高智商嘅科學家，佢無視權威同社會規範、憤世嫉俗，利用智慧達到各種自私目的，經常做危險嘅行為，漠視自己同他人安全，缺乏同理心，同時情感上疏離，情緒不穩定、恐懼被拒絕同被孤立，都係典型嘅反社會或邊緣人格障礙。
由於佢對生命、人類同宇宙嘅懷疑同失望，佢有明顯嘅無力感、抑鬱，婚姻破裂、失去妻兒、危險嘅科學實驗同冒險亦令佢有創傷後壓力症候群（PTSD）嘅症狀。而佢酗酒，喺任何危險情況下飲酒，可能係一種自我麻醉嘅方式，同時加劇佢嘅心理問題。
Morty Smith 係另一位主角，一個缺乏自信又膽怯嘅14歲青少年，傾向自我懷疑，對性好奇而困惑，經常被外公Rick 捲入不可預測嘅冒險旅程，當然都有PTSD。
另外無法與同齡人建立穩定關係，喺學校同家庭都飽受壓力而缺乏支持，所以有明顯嘅自尊問題，同埋抑鬱同焦慮嘅症狀。
至於Morty 嘅媽媽Beth Smith，即係Rick 個女，一個聰明又成功嘅馬外科醫生，不滿自己嘅婚姻、家庭同職業嘅狀態，同佢爸爸 Rick 一樣情感上疏離、酗酒，源於對自己期望過高，缺乏安全感同成就感，所以經常衝動作出決定。
佢亦明顯有人格障礙而無法同他人建立健康關係，好後生就被Jerry Smith 搞大個肚而結婚，一直對婚姻同自我價值有疑惑同不確定性。
Jerry Smith，缺乏安全感又笨手笨腳嘅單純丈夫、爸爸、女婿，家庭同職業中容易受挫，不滿自己家庭同社會地位，一直擔心被取代，強烈追求他人關注同認可，自我價值感薄弱，所以成日作出錯誤而衝動嘅決定，種種不安全感都令到佢有抑鬱同焦慮症狀，但佢唔會忌諱表達自己嘅脆弱。
呢個家庭嘅First born 就係Summer Smith ，一個典型注重朋輩地位嘅高中生。佢係集齊長輩特質嘅角色，佢同外公、媽媽一樣聰明、足智多謀、有強烈獨立意識同冒險慾望；同時都似爸爸咁缺乏安全感，需要他人認可，會為咗迎合他人期望而犧牲自我價值同利益。由父母世代轉移到子女世代，就係代間傳遞（intergenerational transmission）。
面對家庭背景同成長經歷，仲有學校社交壓力，Summer 都一樣有抑鬱焦慮嘅症狀，促使佢有自殘、自殺傾向、濫藥等行為。
睇完有冇覺得自己同任何角色某程度上相似？
心理健康同人格障礙並不可恥，大家睇佢地科幻冒險娛樂時，可以深入了解同關注精神問題，從今開始多啲覺察自己、了解自己。
留言