為興趣網絡寫作十年，堅持寫繁體中文

寫作多年，都係喺網上開過一個作者專頁，就係你依家見到呢個。三年前改返做個人帳號，沿用至今。

由寫小說轉寫精神健康，係我寫作生涯上最大嘅改變。整咗個Page/ Patreon 寫正經嘢，得閒就喺度寫吓隨筆，自在過以前。

以前好多編輯、讀者、其他作者話我文筆似翻譯文學，因為我讀國際學校長大，生活、讀書、拍拖、工作都係用英文較多，連嗌交都係講英文（笑），鍾意睇翻譯文學，但我最鍾意寫中文。

習慣使用英文係環境所致，但中文寫作真係自己執著。我覺得中文好靚，繁體中文更係文化瑰寶。

寫作對我嚟講一直係興趣，唔係職業。鍾意就寫，唔鍾意可以Unpublish 或刪走個專頁。如果將來再寫小說，我可能會用返舊筆名，可能唔會，亦可能唔再用筆名，到時先算。我覺得好多嘢都冇咩所謂，唯一堅持嘅係一直用繁體中文寫作。

希望我下個十年都繼續寫緊。