對小動物唔好嘅人，我一律唔會相信

唔洗講到虐待動物，只要對小動物唔友善，無論邊個都唔會相信，特別係自己養寵物都對寵物差、棄養、無愛心嘅人——佢地不負責任，對寵物嘅態度亦暴露佢地自身嘅不良品格。

接得寵物返屋企，寵物就係屋企人，棄養嗰啲唔洗解釋，祝佢地遲早被自己家人遺棄；虐待動物可能反映出成長經歷同家庭環境缺陷，無論如何都祝佢地被同樣方式對待。

有啲人養寵物嘅Intentions 好古怪，我都唔係太信呢種人。

聽過有人養貓，因為男朋友好錫佢自己隻貓，佢呷隻貓醋先專登自己養隻去激男朋友；我亦聽過強迫伴侶買隻狗去證明自己被愛，但雙方本身都唔鍾意狗；又聽過明明討厭狗，但為咗有把柄在手先「允許」老公養狗，得閒影相打卡，又可以勒索老公湊仔買手袋。

聽親呢啲故事都反感，如果你有啲類似故事都不妨留言分享。

對待生命，最基本係尊重。

你可以驚動物、唔鍾意動物，冇人逼你養，養得就要負責任。對住弱小、Dependent 嘅動物都冇責任感，我都會預咗佢對其他人、事係不負責任。同埋最重要係——對小動物差，就令人懷疑缺乏同理心，而冇同理心嘅人，我多數都唔會相信。